KINGDOM OF LESOTHO
PARLIAMENTARY DEBATES
DAILY HANSARD
OFFICIAL REPORT OF THE SENATE
7th Meeting – First Session
Eleventh Parliament
Tuesday 5th November, 2024
LENANE LA LITHO TSA NTLO EA MAHOSANA TSA PARAMENTE EA LESHOME LE MOTSO O MONG
| 1.Hon. Seeiso B. Seeiso | Principal Chief of Matsieng |
| 2. Hon. Joel A. Motšoene | Principal Chief of Leribe |
| 3.Hon. Sempe Gabasheane Masupha | Principal Chief of Ha ’Mamathe, Thupa-Kubu, Teya-Teyaneng le Jordan |
| 4.Hon. Mamolapo M. Q Majara | Principal Chief of Ha Majara |
| 5.Hon. Tumane Matela | Principal Chief of Makhoakhoeng |
| 6.Hon. Moeketsi Moletsane II | Principal Chief of Taung |
| 7.Hon. Lerotholi Mathealira Seeiso | Principal Chief of Mokhotlong |
| 8. Hon. Lerotholi L. Seeiso | Principal Chief of Likhoele |
| 9. Hon. Theko D. Bereng | Principal Chief of Phamong |
| 10.Hon. Mojela T. Makhaola | Principal Chief of Qacha’s Nek |
| 11.Hon. Seeiso S. H. Nkuebe | Principal Chief of Quthing |
| 12.Hon. Nthupi A. Bereng | Principal Chief of Rothe, Masite, Serooeng, Letšeng, Kolo Ha Mohlalefi le Thaba-Tseka Ha Ntaote |
| 13.Hon. K.L.K Khoabane | Principal Chief of Thaba-Bosiu |
| 14.Hon. Mitchel S. Maama | Principal Chief of Ha Maama |
| 15.Hon Moholobela M. Moholobela | Principal Chief of Matelile |
| 16.Hon. Bereng G. Seeiso Api | Principal Chief of Ha Ramabanta le Kubake |
| 17. Peete Lesaoana Peete | Principal Chief of Koeneng le Mapoteng |
| 18.Hon. ’Mako T.Mohale | Principal Chief of Tajane, Ha Moetsana le Ha Mohale |
| 19. Hon. Khoabane T. Mojela | Principal Chief of Tebang, Tšakholo le Ha Seleso |
| 20. Hon. Retšelisitsoe Mopeli | Principal Chief of Botha-Bothe |
| 21.Hon. Pontšo S. Mathealira | Principal Chief of Tsikoane, Peka le Kolbere |
| 22.Hon. Qeto Sekonyela | Principal Chief of Malingoaneng |
| 23.Hon.’Mawinnie Kanetsi | Senator |
| 24. Hon. Lebona Khoaele | Senator |
| 25. Hon. Thabiso Lebese | Senator |
| 26. Hon. ‘Maphakiso Lebona | Senator |
| 27. Hon. ’Mabataung Patricia Mokhathali | Senator |
| 28. Hon.Sehlooho HenryMonatsi | Senator |
| 29. Hon. ‘Makholu Moshoeshoe | Senator |
| 30. Hon. Neo Matjato Moteane | Senator |
| 31. Hon. Seabata Motsamai | Senator |
| 32. Hon.Richard Ramoeletsi | Senator |
| 33. Hon. Limpho Tau | Senator |
PARLIAMENT OF THE KINGDOM OF LESOTHO
SENATE CHAMBER
TUESDAY 5th NOVEMBER, 2024
The House assembled at 10.30 a.m.
(MR. VICE – PRESIDENT in the Chair)
PRAYER
The Chaplin led the House in Prayer
COMMUNICATION FROM THE CHAIR
MR. VICE-PRESIDENT: Ke kopa ho le lumelisa, Litho tse, Khabane le ho le amohela letsatsing la kajeno, ebile re le khoeling ea Pulungoana e etellang pele ea Tšitoe ha re tla be re phethela selemo sena sa Makhooa.
Announcements
Ke na le litsebiso tse ‘ne, Litho tse Khabane, tseo ke kopang hore ke tle ke li fetisetse ho lona:
- Tsebiso ea pele, ke ea hore re na le le Litsebiso tsa Litlhahiso, e leng Notice of Motions, tseo ke kopang hore Tafole e tle e le fe tsona. ’Me tsona ke tse latelang tse tla buoa ka tatellano ka tumello ea Ntlo ena e Khabane:
- Ea pele, ke Number 34 ea Polokeho le Paballeho ea Bohahlauli sebakeng sa tsoelo-pele ea naha ea Lesotho ka Honourable Senator Kanetsi;
- Ea bobeli, ke Number 35, eona ke e mabapi le phomolo e khutšoanyane e le ho lumella Litho ho ea kopana le The National Reforms Transition Office (NRTO) hosane mane Maseru Avani mabapi le Tenth Amendment to the Constitution Bill, 2024. Le tla hopola, Litho tse Khabane, National Assembly, e leng Ntlo eane ea Sechaba, e tšohlile le ho phethela lipuisano kapa likhang tsa eona ka Tenth Amendment to the Constitution Bill 2024. ‘Me procedurally ha ho se ho le joalo ba qetile, e ee ebe Setšoantšo se joalo sa Molao se tla fetela ka koano ka Senateng hore Ntlo ea Senate le eona e tl’o tla e phethela mosebetsi oa eona holim’a Setšoantšo se joalo.
Joale pele re kena litabeng tsena tsa Setšoantšo seno ka botebo, tumellano e ile ea ba hore re tle re kopane le Ofisi ea Mohlomphehi Letona le Khabane ka eona Ofisi eno ea NRTO re tl’o shebisana litaba tsena pele re kena ho tsona ka botebo tsena tsa Tenth Amendment to the Constitution.
Re tla ba le Motion o hlophisetsang litaba tsena tsa phomolo eo e khutšoanyane hosane hore re tsebe ho ea tšohla le ho seka-seka litaba tsena tsa Setšoantšo pele re tl’o kena ho tsona ka Ntlong ka koano.
- Tlhahiso ea boraro ke Number 36, ‘me le eona ka tsela e tšoanang ke phomolo e khutšoanyane eo sepheo sa eona e leng ho fa Komiti ea Ketsa-Molao (Legislation Committee) sebaka le nako ea ho tla nyakurela le ho hlahlobisisa ka botebo Setšoantšo sena sa Sehlomathiso sa Leshome sa Molao oa rona oa Motheo oa naha ntle le tšitiso ea letho.
Litaba tsena tsona li tla etsoa ka Labone la la 7 Pulungoana, e leng ha ho feta hosane.
- Tsebiso ea bobeli Litho tse Khabane kea hore le tla hopola hore hosane ka Laboraro ke letsatsi la Lipotso, empa joalo ka ha ke hlalositse hore re tl’o ba le Motion koano o re kopang hore hosane tulo e-be sieo re tle re ee ho Workshop ena e il’o shebana le litaba tsa Setšoantšo sa Molao, taba ena e bolela hore Lipotso tse neng li lokela hore li tle li botsoe hosane ha li na tseba hore li botsoe.
Re ne re na le Potso e potlakileng e eang ho Mohlomphehi Letona la Bophelo, e tsoa ho Honourable Senator Moshoeshoe e malebana le litaba tsa sepetlele sa Ntšekhe, Mohale’s Hoek. ‘Me litaba tseno li se li tla chechela ka Labone. E leng ho re letsatsi la potso ha e sa hlola e-ba hosane, e se e tla ba ka Labone, hobane hosane re tla be re na le workshop.
- Tsebiso ea boraro ke hore hona ka Labone, Litho tse Khabane, komiti ea Ketsa-Molao e tla kopana ka morá lijo ka 14:30 hrs ho tla qetela mosebetsi oo ba ntseng ba o etsa oa ho hlahloba Melaoana ea Lekala la Lichelete hona ka Labone.
Hosane, Litho tse Khabane, joalo ka ha re tla fetisa Tlhahiso e re lumellang joalo kopano ea rona le NRTO ka Mohlomphehi Letona ka Setšoantšo sane sa Molao sa Tenth Amendment to the Constitution e tla tsoela-pele mane Maseru Avani, ka hora ea borobong hoseng, ‘me re se re ntse re etsa boipiletso, Litho tse Khabane, hore re tle re iponahatseng.
Re il’o etsa mosebetsi ono e le hore e tle e re ha Setšoantšo seno sa Molao se fihla ka Ntlong ka koano re tle re tsebe hore re etse mosebetsi ono ka thello e le hobane re entse address issues tsohle tseo re tšoanelang ho li etsa address.
Kea leboha, litsebiso li hakaalo.
Ke hlalositse hore re na le Litlhahiso, Litho tse Khabane, ‘me ke hlalositse hore Tlhahiso ea pele ke ena e amanang le Polokeho le Paballeho ea Bohahlauli sebakeng sa tsoelo-pele ea naha ea Lesotho, e leng Tlhahiso e tl’o tla e etsoa ke Honourable Senator Kanetsi. Empa Tlhahiso ena leha ho le joalo ha e-s’o butsoe, Litho tse Khabane, kahoo ke rata hore ke fumane tataiso ea Litho tsa Ntlo.
Question that Motion Number 34 be discussed Put and Agreed to..
Litho tse Khabane re ananetse hore Honourable Senator Kanetsi a tle a tsoele-pele ka taba ena ea Tlhahiso ea hae.
Honourable Senator.
URGENT MOTION
MOTION 34: SAFETY AND SECURITY FOR TOURISM DEVELOPMENT IN LESOTHO
HON. SENATOR M. KANETSI: Ke u lebohe, Motlatsi oa President le Tafole ea hau, ke lebohe le ho lumelisa Bahlomphehi ba Khabane le Ntlo kaofela.
Ke ema mona ho tla etsa Tšisinyo ena, empa litaba tsa eona ke taba ea ntšetso-pele ea litaba tseo re ileng ra bua tsa tsona hanyane bekeng e fetileng. Litaba tsena ke tse amanang le taba eane ea rona ea taba ea ho bolokeha le paballo ea bohahlauli sebakeng sa tsoelo-pele ea naha, e leng moruo oa rona. Ke tla e bala ka bokhutšoanyane:
Motion Number 34:
That the Honourable Senate abhors and condemns recently reported isolated acts of violence against tourists, allegedly by school children. The House calls for investigation of the incident in order to rebuke them. It further urges the Government, Schools, business people and the other agencies to promote advocacy to herd boys, school children and communities on the importance of tourism in strengthening our economy and creating jobs for Basotho. The commitment of leadership towards safety and security of tourists would rebuild their trust and result in a long term Economic spin-offs.
Ntlo e Khabane e boetse e khothaletsa ‘Muso le likhoebo, likolo le litsi tse ling ho matlafatsa mats’olo a ho ruta balisana, bana ba likolo, ekasitana le sechaba ka kakaretso ka bohlokoa ba ts’ireletso le paballeho le kholiso ea bohahlaoli. Boitlamo ba boetapele ka paballeho le ts’ireletso ea bohahlaoli bo ka khutlisa ts’epo ea bahahlaoli ekasitana le ho holisa moruo oa naha.
Mohlomphehi Motlatsi oa President, re mona hobane re re re batla ho ntlafatsa naha, re batla ho ntlafatsa bophelo ba Basotho, ‘me ntho e ‘ngoe le e ‘ngoe e ka bonahalang e sitisa taba ena, re lokela ho e emela ka maoto haholo re le sechaba kaofela.
Beke e fetileng ke ile ka hlalosa hanyenyane hore na taba ena e ka baka bolutu bo bokaakang. Rea re habile nako eo re reng hona joale tjena ka khoeli eona ena ea November, mafelo a eona, re lebelletse baeti ba hlahang linaheng tsena kaofela, ba tla papaling e mona ea lithuthuthu, ea Roof of Africa, ‘me ts’oenyeho ea rona ke hore litaba tsena tsa ho hlasela bahahlaoli, ba be ba ee lingakeng (taba ea lits’oants’o tseno e mathile marang-rang mona) hoo re seng re sa tsebe hore na ebe e tla re ama ka sebopeho sa mofuta ofe.
E leng hore, he, ho molemong oa rona re le Ntlo kaofela hore, Mohlomphehi, re etse polelo e khalemang litaba tsena ka matla, mohlomong le eona polelo ena e tle e tsebe ho hlaha marang-rang, hore kannete re le ‘Muso ha re lakatse ha litaba tsena li etsahala, empa e le botloko-tsebe feela ba bana ba rona.
Litaba tsena li boetse li re tlama hore re bue le mafapha a fapaneng, re ipiletse ho ‘ona, joalokaha re ile ra cho, ee, re ke re bone hore tabeng ea likolo ekaba re ka bua joang le likolo, mohlomong Lekala la Thuto ka likolo tse phahameng le likolo tse tlaase li qalelle ho kenyeletsa taba ea thuto ea bohahlaoli ka hare ho likolo. Re hle re tsebe, bana ba tsebe hore bohahlaoli ke e ‘ngoe ea mantlha, joaloka bo-Metsi a Lihlaba ha a kenya lichelete, joaloka bo-limmaene ha li kenya chelete. Ho hl’o tsebahale ho tloha ngoana a sa le monyenyane hore taba ea bohahlaoli ke e ‘ngoe e ka kenyang chelete ka hare ho naha ena, ke eona e ka fanang le ka mesebetsi.
Le hona joale tjena ke fumane hore selemong sena se fetileng feela sa 2023, ehlile lekeno la chelete le nyolohile haholo ka ntho e kang 28% kaofela moruong oa naha, e hlaha lintlheng tsa bohahlaoli. E leng hore taba ena e bolela hore taba ea bohahlaoli ke e ‘ngoe e ka tlisang lekeno le leholo haholo ka hare ho naha.
Re sa buile ka taba eo ea likolo hore le haeba ho na le taba eo re ka reng hase subjects per say, feela ho bua ka taba ea bohahlaoli ka har’a likolo, re ke re e etse. Babolli le batho ba etsang litaba tsa lebollo, ha re ke re hlokomeliseng balisana ba rona, ha re ke re hlokomeliseng batho ba rona ba bollang hore taba ea bohahlaoli ke e ‘ngoe e ka tlisang lekeno ka hare ho naha.
Private Sector, batho ba likhoebo, mohlomong le bona batho ba likhoebo re ke re ba khothalletse hore ba ke ba kenyeletse sechaba ka hare ho meralo ea bona ea ts’ebetso, e le hore sechaba se nke karolo likhoebong tsa mofuta o joalo, ekaba ka mokhoa oa khiro. Kea tseba li se li ntse li etsahala, empa re ke re etse hore thuto eo e ke ebe matlanyana hore sechaba se tsebe ho baballa taba ena ea bohahlaoli, hobane ba utloisisa hore na e bolelang le molemo oo sechaba se o unang holim’a eona.
Mekhatlo e Ikemetseng kaofela le eona e ee e thusane haholo mafapheng a ho tlisa thuto sechabeng ka litaba tse fapakaneng. Mohlomong le eona ena ke eona eo re ka atametsang Mekhatlo e Ikemetseng hore e tl’o re thusa ka sebopeho sena.
Libini tsa rona. Re ke re khothalletse libini tsa rona ho etsa boqapi ba lipina ka litaba tsa bohahlaoli. Batho ba bang ba sebetsanang le boqapi ba ke ba etse boqapi ka litaba tsa bohahlaoli. Li tla re thusa le hore re tle re tsebe le ho baballa le tikoloho ea rona, e le hore batho ba chakelang naha ea rona ba khahloe.
Ha re sa le mono re be re bolele ka ts’oenyeho hape hore ke ile ka fumana hape ho tsoa ho LTDC, e leng Lekala le tlas’a Ministry of Tourism, hore Sepolesa kapa Mapolesa a mang a ntse a tsoela pele ho hlophana le bahahlaoli, ho ba batla tjotjo. E leng ho re ena, beng ba ka, re lokela ho e emela ka maoto haholo!
Minister of Local Government, Sepolesa sa hao se ntse se batla bahahlaoli tjotjo tseleng. Ke maoba feela ha re fumana tlaleho ena. E leng hore le eona ena ke e ‘ngoe eo re tlamehang hore re e khalemele ka tsela e khethehileng, Mohlomphehi oa ka.
Kannete ha ke chulo tjena, Mohlomphehi, ke ne ke se ke mpa ke bolela feela hore ke ne ke haella holim’a litaba tseo re li buileng bekeng e fetileng, joale re mpa re li tlisa into a form of a motion. Ha ke cho tjena, Mohlomphehi oa ka, ke re kannete ha re le ‘Muso ha re nkeng taba ena ea bohahlaoli ka matla, ka mafapha ‘ohle a fapaneng, re ke re holise bohahlaoli joalokaha re se ntse re bona hore bo tlisa mesebetsi e mengata, bo etsa lekeno le lengata ka hare ho naha.
Ke sa chulo joalo, kea sisinya.
MR. VICE-PRESIDENT: Ea mo tlatsang, Litho tse Khabane.
HON. SENATOR M.Q. LEBONA. Kea leboha, Ntate Vice-President. Ke tlatsa Motion ona oa Mofumahaili Kanetsi o buang ka paballeho le litaba tsa bohahlaoli. Kannete, Ntate, ’M’e o buile taba e ileng ea etsa hore naha ea Lesotho e hlahe e le litabeng tse mpe haholo, hobane ha se khale mona ho n’o na le mohahlaoli e mong ea neng a tlile ka har’a naha ka mona, a paka ka mokhoa oo Basotho ba ka mono ka thabeng ka Mokhotlong ba ileng ba mo thusa koloi ea hae e ne e na le bothata ba tyre. Ha e le mona ho s’o hlaha ena e tjena, e se e hlakola botle bane boo ‘m’e a neng a ngotse marang-rang hore naha ea Lesotho re ts’oare joalo.
Kannete, ‘M’e, rea e tlatsa taba ena hore mafapha ‘ohle a amehang mosebetsi o hlahile ke oo oa hore re rute sechaba sa rona ka taba ea bohlokoa ba bohahlaoli kahar’a naha ea Lesotho. Kea tlatsa.
Question proposed.
HON. SENATOR S.H, MONATSI. Ke u lebohe.
Ka uena, Ntate Vice-President le Tafole ea hau, Ntate, u s’u re lebohetse hore ke beke ea pele eo re seng re ea Keresemeseng ho eona.
Ehlile, Ntate, litaba tsena li kholo haholo, ‘me le rona lihoai re se re ingoaea leha ‘M’e Kanetsi a li buile, ebile mafapha ‘ohle kaofela a thetsitsoe, a bua le ka rona lihoai hore joale bo-ntate le bo-abuti bana ba alosang ba ikarabella ho rona ka lithabeng ka koana, hore kannete re eme ka maoto ho kenya sekolo hore bo-abuti ba hlokomele likoloi tseo tse fetang li jahiloe le bana ba likolo le rona baetapele, ba se ke ‘ne ba re, ‘sweets, sweets ‘ pel’a tsela mona.
Taba eno ke eona e bakang litaba tsa litlolo tsa molao, joale ea…(LERATA)…some sweets ha ba bona Makhooa a feta ka mono, joale taba ena e kholo kannete molemong oa naha hore re bone hore re bua le matichere. Baokameli ba likolo re ntse re tlameha re ba atamele mahae mane ho re, hela, bana ha ba thijoe!
Ebile joale ‘na kea tseba ka kotloloho hore le Tona-Kholo ea rona ea naha ena ke e mong oa bapalami joalo ka ha ‘M’e Kanetsi a re haufinyane ho s’o nts’o tl’o palangoa – ke e mong oa bapalami, joale ba se ke ba re nts’etsa Tona-Kholo leihlo ka lejoe. Ehlile ke mojahi oa lithuthuthu le likoloi.
Ka mabaka ana ke re kannete, ‘’M’e Kanetsi, litaba tsa hau li kholo, li matla, kannete, re hlile re li nkile ka hloko hore re e’o li fetisa ha habo rona koana! Ebile ke thabela ena ea hore ebe ‘M’e o ntse a re ho na le taba e ileng ea hlaha hore batho ba Mokhotlong ba ile ba thusetsa mohahlaoli koloi e na le puncture ka mono. Kannete taba eno eona ke tlotla, re ntse re tlameha ho e fetisa, ho re, ts’oarang kathata batho ba Mokhotlong, le bone hore le thusa motho e mong le e mong, hoba hona joale ebile re kahar’a boipuso bana ba Basotho ba na le lilemo tse makholo a mabeli ba thehiloe. Joale re tlameha hore re thusaneng; Morena Moshoeshoe I e ne e le motho ea neng a rata batho haholo, ke ha a tla bopa sechaba sena sa Basotho. Joale re tlameha ho thusana, re se ke ra khetholla ra re ke Lekhooa, ra re ke Lekula! Ae, le Ma-China kannete ha rea khetholle leha a se a tletse naha ena ea Lesotho hakana, ‘me e se e le bana ba rona. Rea bona hore ho s’o tla ba le bo-Thabo le bo-mang-mang ba Ma-China joale tjena naheng ena.
Kea leboha, Ntate Vice-President.
HON. SENATOR M.M. MOSHOESHOE: Ntate Vice-President, kea u hlompha, Ntate le Litho tse Khabane.
Ke ema mona kannete ho lahlela molangoana oa ka holim’a Motion ona o matla. Kannete ruri re ema ka masoabi le ho makala ho utloa hore kae-kae ka har’a naha ena ea Lesotho ho nts’o na le bana ba mofuta ona, bao e reng ha ba bona molata, kapa mohahlaoli, ebe b’a mo hlasela. Ke ntho e soabisang haholo. Empa, he, ke ena ketso e se e etsahetse, ‘me re tlameha re e khalemele ka matla.
‘Na maobane ha ke bona Motion ona o kena ho rona marang-rang mona ka li-e-mail, ke ile ka qholotseha haholo, ke re Honourable Kanetsi eke a ka hla a nka taba ena ka lechoba, a kopana le Marena.
Balisana motseng mane ba ikarabella ho lihoai, joalokaha Mohlomphehi a chulo, ba ikarabella ho malapa, ba ikarabella ho Marena. Ha re il’o beha, re bitsa balisana le beng ba mehlape, re ts’oara lipitso re le Marena, joale rea bonts’a hore re koala sebaka se itseng for nako e itseng, re Phunya mona, ‘le ka lisetsa mona’. Re lula ‘moho, ebe re shebisana mabaka, re ntano fihlela tumellano ea hore na liphoofolo li ka fula kae ka nako e boletsoeng, ‘me ke bona e le eona platform e ‘ngoe eo re ka e sebelisang ho khalemela balisana bana ka liketso tseo ho bonahalang joale ba khahloa ho li etsa.
Rona ha re sa ntsane re hola mehleng ea rona, koana lilemong tse 50 mang-mang tse fetileng, Mohlomphehi…(LITS’EHO)…rona re ne re tseba ha re bona Lekhooa re lilietsa, re thaba, re bona khotso e tla ka har’a Lesotho, re bona bahaisane linaheng tse ling ba thabela ho tla boha naha ea rona ea Lesotho. He, ke echaba, Mohlomphehi…(LITS’EHO)…ke mpa feela ke hanne ho ja mabele. Kannete ke makalla bana bao e reng ha ba bona molata, kapa lona Lekhooa ba sa thabe!
Taba eno e ne e le tlotla e kholo, hobane re ne re tseba hore ha habo bona koana, ha ba tla koano, chelete ea habo bona e phaha-phahame ho feta chelete ea Lesotho, ‘me chelete eno ea bona ha e fihla mona e tl’o eketsa moruo oa naha ea Lesotho. Ke thuto eo re tlamehang ho e ruta bana ba rona ba balisana le hore ba tsebe hore motho ha e le moeti oa hlomphuoa. Motho h’a etetse haeno ua mo hlompha, ‘M’e, ebile u fiela le mabala, u mo hlekela litsela, ha u batle a bone le bohlasoa ba lelapa leno. Naha ena ea habo rona ea Lesotho, re batla e hloeke. Re bile re tlosoa le ka likamoreng ka koana, ho thoe re tlohe baeti ba teng.
Batsoali ba rona ba ne ba nts’a le lipoleiti tsane tsa khalase tseo esale li pakoa mane, ho hlajoa khoho eane eo esale ho hanoa ka eona ho ntse ho thoe khoho ena ha re na ho e hlaba. Ho ne ho nts’oa likhalase le cutlery eane e sa sebelisoeng mehla ena- ke mohlang e tla nts’oa.
Rona re hlompha baeti. Ke ho re ke soabile haholo hore ebe bana bana ba etsa liketso tse tjena.
Ua tseba ke hoseng hona ha ke ne ke mametse litaba ho SABC1, ke maketse ke utloa ho thoe mohahlauli e mong hona maobane South Africa mona, ho Province ea KZN, o fihlile moo – o ile a ea ATM at a garage, o nts’a chelete, ha a qeta ho etsa joalo, tsotsi tsena tsa South Africa li se li bile li mo hlasela hona mono, li mo koetela, li bile li mo khakhatha. Ka lehlohonolo ke utloile hona joale litabeng tsa hora ea leshome hore litsotsi tseno li fumanoe.
Ke lintho tse mpe, tse soabisang. Joale rea ba tseba ba tla li mamela, ebe b’a li kopitsa; ba tloha ba kopitsa ena ea ho ba emela mechining ea ATM.
Ka hona, ka ‘nete re kopa Sepolesa sa rona se eme ka matla, leha le sona se ee se re soabise, joale ebe se kopa bahahlauli tjotjo. Ke ne ke utloe Letona le Khabane le khalemela taba eno ka matla a maholo.
Re tlameha ho bona hore na ts’ireletso ea bahahlauli ha ba qala ba kena ka har’a naha – hore na, naha ea Lesotho e ka ba sireletsa joang. Ba bang kannete ba ee ba hire tour guide, u fumane o tsamaea le motho e mong oa Mosotho, ea tla ‘ne a mo bonts’e libaka. Ba bang ha ba etse joalo, feela kannete re ke re bone hore na Lekala lena la rona la Bohahlauli, le ke ke la etsa mokhoa oa hore ba sireletsehe.
Taba e kholo, eo ‘na ke e hatellang, ke ho re thuto e be teng ka malapeng, e be teng ho Marena, le ho Bakhethoa ba Puso ea Libaka. Taba ena re e bue ka matla, le moo libakeng tseo ebang ha e e-s’o etsahale re e bue, re hle re ‘ne re khalemele taba ena hore re hle re e nts’e ka metso kahar’a bana ba rona le ho balisana. Ebe ho bona re re, hlokomelang bahahlauli, hlokomelang baeti, hlokomelang melata eohle ha e kena ka har’a naha.
Labohlano habo rona koana re ile ra ba monate hampe, Mohlomphehi, ke u qoqele! Tona-Kholo o ne a ile, a bitsitse balisana ba 44 a ba fa linku tse 11. U se u ka etsa 44×11 ua bona hore na ke tse kae, 11 per person. Re ne re le hae mono. Balisana ba bangata hakaalo! Ntho e ntle hakaalo! Ha ba fuoa linku tseno feela, ba fuoe le likobo, meriana le masekhe.
Ke ho re mokete o motle hakaalo, oo u bonang hore ‘Muso oa Lesotho o ts’oere hantle, o batla hore o phahamise balisana. Ha ba se ke ba re soabisa.
Ntho e ‘ngoe e kholo, eo ke batlang ho e hlokomelisa Mohlomphehi Kanetsi ke ho re rona re le Marena Liofising tsa rona re na le mekhatlo ea balisana e ngolisitsoeng; ho na le balula-setulo, ho na le li-record, ‘me ke tl’o nka taba ena ea hau, ke tl’o e phamolela holimo.
Ke se ke kokota lipelong tsa Marena a ka a Sehlooho, ho re le rona ha re fihla metseng ea rona koana, re e’o bua ka taba ena. Taba ena e bohloko, e mpe, e thefula seriti. U tsebe seriti sa naha ha se theohile, ho boima haholo ho boela se nyoloha.
Ka hona ke re Tlhahiso ena, ‘na ke e thoholetsa haholo, ke re re se re tl’o e phamolela holimo rona re le Marena, re bone hore re e’o khalema kathata balisana bane bao re phelang le bona. Re le tjena le rona u tsebe re ntse re hirile balisana, empa ha u ntse u khalemela hanyenyane molaetsa o tla qetella o anetse sechaba kaofela.
Ka mantsoe ana, ke tlatsa le ho thoholetsa Tlhahiso ena ea Setho se Khabane. Kea leboha, Mohlomphehi.
HON. SENATOR M.Q. MAJARA: Kea leboha, Mohlomphehi. Ke leboha le ho thoholetsa Setho se Khabane Hon. Kanetsi ka Tlhahiso ena e ntle, Tlhahiso e kokotang lipelong tsa rona re le Babusi ka mekhahlelo,Tlhahiso e tsoetsoeng ke ketsahalo e sa kang ea hlahisa naha hantle, eo balisana ba inketseng taolo ho kena-kenana le mohahlauli eo ea neng a le teng ka hare ho naha.
Ke thoholetsa Tlhahiso ena, kea e aka, ke lumellana le Litho tse Khabane le maikutlo ao li faneng ka ‘ona. Ke mpa ke re feela ke tla kena ka lehlakoreng la rona re le Babusi ba Marena, hore taba ena re ke re e nkele holimo haholo, re khutlele libakeng tsa habo rona moo re e’o kenya thuto, haholo ho balisana.
Taba ena, re be re kope ‘Muso ho e nkela holimo haholo, ka ho kenya mananeo li-ea-le-moeeng tsohle tse teng ka hare ho naha, le ho reka mananeo ho Lesotho Television ele ho anetsa molaetsa ona, ha re ntse re tla re le lehlakoreng la Babusi ho thusana.
Litho tse Khabane, taba ena e etsahetseng – Setho se Khabane Hon. Moshoeshoe o re naha e-ea thefuleha. Hase taba e monate, hore ka letsatsi feela ho ka tsohoa ho se ho buuoa ntho e kholo ka hare ho naha, e etsang hore batho ba ikutloe ba bile ba ka ba le ts’abo ea ketsahalo e le ‘ngoe feela, empa ho na le lintle tse ngata tse etsahalang ka har’a naha, empa ketsahalo e le ‘ngoe feela, e seng ntle, ebe e thunthetsa le ho tlisa ts’abo.
E leng ho re, ke thoholetsa Setho se Khabane ka Tlhahiso ena, ke bile ke lebohisa Setho ka Tlhahiso ena e nonneng.
Ka mantsoe ana, Ntate, ke tlatsa Tlhahiso ena.
Kea leboha.
MR. VICE-PRESIDENT: Litho tse Khabane, Tlhahiso ena ea Hon. Kanetsi ke ntse ke hopola hore bekeng e fetileng e ile ea tla ka sebopeho se seng, eaba Hon. Senator Motsamai o ema ka Ntlha ea Ssamaiso hore mohlomong e ka ba ntle – ke sa re le Morena oa Matsieng, hore e ka ba ntle ha e ka tla ka sebopeho sena seo e tlileng ka sona kajeno.
Joale ke ne ke nahana hore le tla e ts’ets’etha haholo, joale kea bona le ile la ints’a monate bekeng e fetileng, eaba le se le kena ho eona, le e ts’ohla. Ke ne ke nahanne hore ha e le mona ele hona e keneng, le tla hle le kene ho eona ka botebo, hobane ruri litaba tsena tsa bohahlauli ke tse bohlokoa haholo, tseo ‘na ke bonang ele e ‘ngoe ea mehloli e moholo haholo e ka re kenyetsang revenue ka har’a naha ka mona.
Hantle-ntle ka ‘na, ke bona eka e ka ba ea feta le mehloli ena e meng, eo re seng re ntse re na le eona, e kang ea litaemane, metsi le e meng.
Joale ke ne ke nahanne hore ka lebaka la bohlokoa bono ba eona le tla ba le thahasello e kholo, le hle le e ts’ohle haholo le ho hlahlella Letona (leha ke bona, ho re ha le eo) kaha re ee re re, ha ho etsoa litlhahiso tse kang ena, ho bohlokoa hore Letona le amehang kapa bonyane Boetapele ba Lekala bo be teng, kaha sepheo se seholo sa Litlhahiso tse kang ena ke ho hlahlella Matona a Khabane, joale a tsebe ho nka malebela, a e’o bona hore na a intlafatsa joang molemong oa naha ena le molemong oa sechaba.
Kea hlokomela ho re ekare Letona ha le eo, hobane le lona Letona re ne re ka rata ho tseba maikutlo a lona, haholo haeba Ntlo ena e Khabane e tla qetella e ananetse litaba tsena.
Ntumelleng he, Litho tse Khabane ke behe taba.
Question put and agreed to.
RESOLVED:
“That, the Honourable Senate abhors and condemns recently reported isolated acts of violent attacks against tourists, allegedly by school children. The House calls for investigation of the incident in order to rebuke them. It further urges the Government, Schools, business people and other agencies to promote advocacy to herd boys, school children and communities on the importance of tourism in strengthening our economy and creating jobs for Basotho. The commitment of leadership towards safety and security of tourists would rebuild their trust and result in long term economic spin-offs”.
MR. VICE-PRESIDENT: Litho tse Khabane, litaba tsena li bolela hore Ntlo ena e Khabane ea Senate e ananetse Tlhahiso ena ea Setho se Khabane ‘M’e Kanetsi ka mokhoa oo e behiloeng kateng.
Joale ka ha ke hlalositse, ha litlhahiso li ananetsoe ke Ntlo ena e Khabane, kaha ‘nete e salang phethahatso ea tsona e se e ba mahetleng a Matona a Khabane, ka Makala ka ho fapakana,
ho bohlokoa haholo hore re n’o tsebe hore na joale ntlha-kemo ea Letona le joalo ke efe, ha Ntlo e ananetse le ho fetisa Litlhahiso tsa mofuta ona o tjena.
Ka bomali-mabe, joale ka ha ke bonts’itse, Letona le Khabane la Bohahlauli ha le eo ka mona, empa he, kea kholoa ke ho re molemong oa ho qoba hore re n’o etse litlhahiso tseo re sa tsebeng hore na li felletse hokae. ke ho re Ofisi ea haeso, ka Tafole, re tle re kopane le Letona le ikarabellang joale re tle re tsebe ho tseba hore na Letona maikutlo a lona ke afe, khopolo ea lona ke efe ka litaba tsena tse fetisitsoeng ke Ntlo ena e Khabane.
Litlhahiso tsa lona li se ke tsa fella feela moo le sa tsebeng, eaba le ntse le ints’a monate feela, le sa tsebe ntlha-kemo ea Bahlomphehi Matona a Khabane ao e leng ‘ona a phethahatsang litaba tsena.
Litho tse Khabane, ke ne ke ile ka hlalosa hore re na le Litlhahiso tse tharo – tse peli ke tsa kajeno, ha e ‘ngoe, che, e tla ba ea Labone.
Joale Tlhahisong ena e ‘ngoe ea bobeli re ne re ts’oanela ho etelloa pele ke Moetapele oa Ntlo. Ka bomali-mabe ha a eo, empa ha a le sieo tjena re ee re be le tlhophiso ea hore e mong oa Litho tsa rona a tle a re tataise ka Tlhahiso ena ea phomolo ea nako e khuts’oanyane, ‘me ke tla kopa Honourable Senator Moshoeshoe ho re etsa lead litabeng tsena.
HON. SENATOR J.A. MOTS’OENE (POINT OF ORDER): Mohlomphehi, Ntlha ea Tsamaiso eo ke emang ka eona ke ea hore litaba tsena tsa hore re tle mosebetsing ha li bonahale li tsamaea hantle ka mabaka a mabeli kapa a mararo.
Ha esale re re, re lokisetsoe litaba tsa linomoro-polata tsa likoloi. Ha re bone ts’its’inyeho ea litaba tseno tsa linomoro-polata tseno tsa likoloi hore na, ana re sa lokela hore re fumane thuso ka ha esitana le eena Mohlomphehi Moeta-Pele oa Ntlo ebile e le Letona le ikarabellang litabeng tseno. ha re ‘mone kahar’a Ntlo ena! Ke ho re re utloa re khathala matla!
Mohlomphehi, na Setulo se ka ba mohau hore se ke se bone hore re fumana taba ea linomoro-polata tseo li khone ho kena on the disk, hobane ba tlohang hole ba bang ha re tloha ka mane re ka lakatsa hore hore re tsoe le ka naheng ena ea boahelani, e leng nako e khuts’oanyane haholo ho tsamaea ka mono.
Ha u qala u fihla borokhong mono taba ea pele ha u kentse nomoro-polata eno ba u botsa hore ha e hlahe on the disk joale na re e nka kae.
Litaba tsena, Mohlomphehi, ke mpa ke ema ka Ntlha ea Tsamaiso hore na ebe Setulo se ka ba mohau hore se ke se re thuse re ke re bonahale le rona re le Litho tsa Paramente?
Ha ke behile hakana, Mohlomphehi, ke ne ke teka Ntlha ea ka ea Tsamaiso.
Kea leboha.
Pause
MR. VICE-PRESIDENT: Morena oa ka oa Linare, ke utloile Ntlha ea hau ea Tsamaiso, Morena oa ka. Nakong eo u e tekang mona ke ile ka hopola hore litaba tsena li se li ile tsa ts’ohloa ka Ntlong ka mona nakong ea ho feta. Ke ntse ke hopola hore ka nako eno ho ne ho kopiloe Litho tse Khabane hore li fane ka litokomane. Ho ne ho ile hoa thoe ba fane ka ID, blue card le registration certificate.
Sepheo e ne e le hore ba il’o lokisetsoa tsona litaba tsena tseo ho buuang ka tsona. Ke ntse ke botsa Tafole ea haeso koano hore na Litho tse Khabane li ile tsa fellisa litaba tseno na. Ke hopola ho ntse ho etsoa litsebiso hangata ka mona hothoe Litho tse Khabane li fellise litokomane. Mr. Clerk o mpolella hore, ae, ka ‘nete Litho tse Khabane li fane ka litokomane tseno. O re ke ba fokolang feela ba sa fanang ka tsona. Kea kholoa ke ba sa hlokeng linomoro tseno, hobane ‘nete e salang ha li ke be li hlokoe ke e mong le e mong.
Ke ntse ke hopola hore Paramenteng ea Leshome, ke ne ke ntse ke le Setho sa Ntlo ena, empa ke e mong oa batho ba sa kang ba nka li-plate number tseno tse ileng tsa fanoa. So, taba eno ha e bolele hore re ka sitoa ho tsoela-pele ka mosebetsi hobane ho thoe ho emetsoe batho ba sa fanang ka letho.
Tafole e ntlalehela hore bothata ha bo mono. Ha se taba ea litokomane tsa lona. Bothata bo hona ka mane ka Lekaleng. Ha le e-s’o ka le etsa print out ea litokomane tseno. Ho ntse ho emetsoe Lekala.
E leng hore hoo re seng re ts’oanela hore re tl’o fumana tlhaloso ka hona ke Lekala ka Mohlomphehi Letona ebile e le Moetapele oa Ntlo ena, a tl’o tla a re hlalosetsa hore na bothata bo hokae, hobane joale Litho tse Khabane haesale li lebella, le rona re le Ntlo haesale re lebella joale ka ha re ile ra ts’episoa.
Ke hore re tle re etse litlhophiso hore Mohlomphehi Letona a tl’o re hlalosetsa hore na ebe bothata bo hokae, le hore na ebe Litho tse Khabane li tla thusoa neng.
A VOICE FROM THE FLOOR: Butle ke kena ka…
MR. VICE-PRESIDENT: U fuoe ke mang, Morena oa ka? Ke Morena oa Sehlooho oa Butha-Buthe ea u fileng? (Laughter)
HON. SENATOR J.A. MOTS’OENE: Kea leboha, Mohlomphehi.
Ka ‘nete taba ea karabo ena e ea utloahala, Mohlomphehi, feela ehlile taba ena eo ke e buang ke kopa hore Setulo se tle ke se e shebe ka leihlo le nchocho, se ke se kene tabeng ena mohlomong ka ho fumana ka matla-matla hore na e ka ba ka pele ha kae.
Ke ‘nete re ne re ka ‘na ra e etsa Potso, feela joale ho latela ‘na tsela eo ke eeng ke bone Bahlomphehi ba etsa treat Ntlo ena kateng, ha ba e nke joale ka ha eka ke Ntlo ea Paramente ebile e ka holimo ho Ntlo ea Bakhethoa.
Mohlomphehi, taba ena ke e bua tjena hobane motho e ee e ke u tla hlaha u le likhathatso. Hona joale Tona-Kholo o tsoa haeso Leribe mane. Hore na o itse eng ho mang, ha ho na motho ea tsebang! Ke re ke litaba tseo re li ts’ohlang hona ka hare ho Ntlo ena. U bona eka ba fapane kae le (ha ke batle ke re le lona feela molaetsa o fetile), le bane ba neng ba ntse ba fetile (laughter)?
Ha se taba e ntle, Mohlomphehi, ena ea hore re le Baeta-Pele ba sechaba re fihle re etse litaba tseo e reng kamoso ha sechaba ekaba se na le tletlebo kapa se na le tatello ea taba, u fumane hore joale you are working in silos.
Mohlomphehi, ruri, hle, Bahlomphehi ha ba ke ba shebe taba ena e le Litho tsa Paramente, e le Baeta-Pele ka Pusong hore ka ‘nete re Baeta-pele ba sechaba kaofela, ‘me litaba tsa Puso re tlameha hore re li ts’oare hantle.
Kea leboha, Mohlomphehi.
Pause.
MR. VICE-PRESIDENT: Rea leboha, Morena oa ka oa Leribe.
Joale ka ha ke hlalositse, bothata ekare bo ka mane ka Lekaleng lena la Lipalangoang, ‘me re le Boeta-Pele ba Ntlo kapa Tafole ena ea haeso re tla etsa litlhophiso le Mohlomphehi Letona hore a tl’o tla a re beha sehlohlolong hore na ebe o se a hatetse pele hakae.
Ena ea treatment ea Ntlo ena e Khabane u paki ea ka hore ke etsa boipiletso khafetsa ho Bahlomphehi Matona a Khabane hore seo ba se etsang ka mane ka Lekhotleng la Sechaba, ba se etse le ka mona. Ha Lipotso li arabiloe ka mane, ka mona li se ke tsa chechisoa, le ka mona li arajoe! Ha ho entsoe Polelo ka mane, le ka mona e tl’o tla e etsoa ka tsela e ts’oanang.
Hantle-ntle ha ho hlokahala li-Statement tseno tsa Bahlomphehi Matona ha li hloke hore nako ena kaofela li qale ka mane, le ka mona li ka qala li il’o qetelloa hona ka mane.
So, taba eno eo u etsang boipiletso ba eona ke taba eo ke lulang khafetsa ke etsa boipiletso ho eona ho Bahlomphehi Matona a Khabane, ‘me le eona ena re tla kopana le Mohlomphehi Letona Moteane re tsebe hore a re thuse hore litaba tsena li sebetsoe.
Li se li na le nako e telele haholo li ntse li hulana li sa fele, ‘me re ts’oanela hore re tsebe hore na bothata bo hokae. Haeba Ntlo ena e Khabane e ka tseba ho mo thusa, e tle e mo thuse kamoo e ka tsebang ho mo thusa kateng hore ts’ebetso eo e fele.
Honourable Senator Moshoeshoe, re ka tsoela-pele Mohlomphehi.
URGENT MOTIONMOTION 36: SHORT ADJOURNMENT.
HON. SENATOR M.M. MOSHOESHOE: Ntate Vice–President, ke ema mona ho etsa Ts’its’inyo ea phomolo e khuts’oanyane:
“That this Honourable Senate when it rises today, Tuesday 5th November, 2024, it do adjourn until Thursday 7th November, 2024 at 10:30 a.m. in order to allow Legislation Committee to execute business on the 10th Amendment to the Constitution, Bill 2024.”
Re tla hopola, Bahlomphehi hore Bill ena etlare ha e se e fihlile ka mona ka Senateng e tla fihlela ho Komiti ea rona ea Legislation, ‘me Molula-Setulo oa Komiti eo le Litho tse teng li tla e ts’ohla pele e ka ea fetela ka Ntlong. Joale empa e ka ba bohlokoa hore re eeng kaofela to this Workshop ea hosane re il’o kenyang letsoho le ho ithuta Bill ena.
Kea tseba, Bahlomphehi, hore le na le maikutlo le litlhahiso malebana le Bill ena. E ka ba ka nepo hore hee, hosane re kopane kaofela re le Litho tse Khabane re eeng re il’o sheba hore na Bill ena ha e le mona National Assembly e se e sebelitse, na e sebelitsoe ho fihlela kae. Na rona maikutlo a rona a kenyellelitsoe, le hore na re ka kenyelletsa lintlha life holim’a Bill eno le hore na re tla e tsamaisa joang.
Workshop ena e tl’o re thusa hore nakong eo Bill e seng e tla ka koano, flow ea mosebetsi e tle e tsamaee habonolo, le hore,Mohlomphehi Ntate Vice-President (ke ee ke bone hangata – Che ‘na ka hobane ke Setho sa Legislation Committee, ke ee ke bone rona re le Litho tsa Komiti eo re na le nako e ngata ea ho sebetsa Bill, ebile re fuoa monyetla oa ho hlahisa maikutlo) nakong ena eo Bill e seng e ka tla ka mona ka Ntlong e tl’o etsoa pilot ke Letona – Litho tseo e seng karolo ea Legislation Committee li ba le nako e nyenyane.
Workshop ena e tl’o re thusa hore ka hobane mane hosane re il’o e sebetsa re kopane kaofela, ho be bobebe; le hore Litho tseo e seng karolo ea Legislation Committee li tle li kenye contribution ea tsona.
Ka hona kea sisinya, Bahlomphehi, ka ‘nete kea ikokobetsa. Ke kopa hore hosane re tle re ee moo Maseru Avani ka nako e tla boleloa hore na re tla qala ka nako mang, re il’o etsa mosebetsi ono. Ke letsatsi le le leng feela, Labone re tla boetse re khutletse hona ka Ntlong ka mona.
Kea sisinya.
HON. SENATOR S.H. MONATSIKe u lebohe, Ntate Vice-President. Ka uena, Ntate le Tafole ea hau, Ntate, re tlatsa Motion ona oa ‘M’e Mofumahali oa hore hosane re bonahale ka mono ka Maseru Avani, motho a tle a se ke a ‘na a re empa litaba tsena tse neng li tsoa sechabeng ho ne ho ntse ho e-na le ho itseng le ho itseng ho siuoeng morao.
Re leboha mantsoe ano a ‘M’e ha a re le rona re il’o tseba hore moo e-bang ho na le ho setseng, re ho behe mono, re ho tempe e le hore li tle li fete li le shoqo ho khutlela ho beng ba tsona, e leng sechaba.
Kea mo tlatsa, kea leboha, Ntate.
(LIATLA)
MR. VICE-PRESIDENT: Rea leboha, Honourable Senator.
Litho tse Khabane, ke na le debate ka bokong ba ka ka mona, empa hee, ere ke nts’e debates tseno hore na – Kaha taba ee kea tseba hore ke taba eo le ileng la e qoqa haholo la ba la kopa hore pele Sets’oants’o sena se kena ka mona le ke le il’o kopana le Mohlomphehi Letona le bao a sebetsang le bona, le ke le ts’ohle taba ena.
Debate tseo ke neng ke ntse ke li etsa ke hore na ke teke taba kapa le ke le ts’ohle taba eno kaha haesale le e nyoretsoe, kapa ke hle ke behe taba ebe re fetile.
Ka lebaka la hore ke bone hore le ho tlatsa ebile bothata ke kopa hore le ntumelle hore ke behe taba ke se ke be ka e teka, hobane joale ke tla tloha ke e teka joale ke bone hore le ntse le sa e ts’ohle hape ha ke qeta ho e teka.
Question put and agreed to.
RESOLVED:
“That this Honourable Senate when it rises today, Tuesday 5th November, 2024, it do adjourn until Thursday 7th November, 2024 at 10:30 a.m. in order to allow Legislation Committee to execute business on the 10th Amendment to the Constitution, Bill 2024.
MR. VICE-PRESIDENT: Litho tse Khabane, Ts’its’inyo ena kapa Tlhahiso ena e fetisitsoe ke Ntlo, ‘me taba ena e bolela hore hosane ha re na ho tla ka koano ka Ntlong, re tla ea mane Maseru Avani moo Phutheho e tla qala ka hora ea borobong hoseng, re il’o kopana le Mohlomphehi Letona le moifo oa habo ka sepheo sa hore re il’o nyakurela le ho hlahloba litaba tsa Sets’oants’o sena sa Molao pele se tla ka koano.
Taba ena ha se taba e tloaelehileng ho etsahala, Litho tse Khabane, empa ka mabaka re ile ra etsa qeto ea hore re etse litlhophiso le Mohlomphehi Letona le Khabane hore, ae, ka ‘nete, pele Sets’oants’o sena sa Molao se ka tla ka Ntlong ka koano, re ke re il’o kopana le eena le moifo oa habo, re shebisane lintlha tse peli, tse tharo, li otlolloe, e le hore ha Sets’oants’o sena sa Molao se tla koano ebe e le hore se se se tsamaea ka thello feela e le hobane re otlollotse tsohle tseo re lokelang hore re li otlolle!
Ke se ke ntse ke ipiletsa, hee, Litho tse Khabane, hore bohle kaofela ha re etseng hore re il’o ba mono Maseru Avani hosane, ka hora ea borobong, re il’o etsa mosebetsi ono o tla re nolofaletsa haholo.
Ea pele, o tl’o tla o nolofatsa mosebetsi oa Legislation Committee haholo. Ka ntle ho mono o tl’o boetse o nolofatsa mosebetsi oa rona ha Sets’oants’o seno sa Molao se fihla ka Ntlong.
Litho tse Khabane, ha e le mona re fetisitse Phomolo ena e khuts’oanyane ea hosane, taba ena e re fihlisa pheletsong ea mosebetsi oa rona oa letsatsi lena.
Ntlo e se e tla kopana ka Labone la la 7 Pulungoana, 2024 ha hora ea leshome e fetile ka metsotso e mashome a mararo hoseng.
ADJOURNMENT
There being no further business on the Order Paper, Mr. Vice-President adjourned the House without Question put, pursuant to the Standing Oder No. 16 (3).
The House was adjourned accordingly at 11:35 a.m.