KINGDOM OF LESOTHO
PARLIAMENTARY DEBATES
SENATE CHAMBER
DAILY HANSARD
OFFICIAL REPORT OF THE SENATE
FIRST SESSION – ELEVENTH MEETING
ELEVENTH PARLIAMENT
TUESDAY 2nd JUNE 2026
LENANE LA LITHO TSA NTLO EA MAHOSANA TSA PARAMENTE EA LESHOME LE MOTSO O MONG
| 1. Hon. Seeiso B. Seeiso | Principal Chief of Matsieng |
| 2. Hon. Joel A. Motšoene | Principal Chief of Leribe |
| 3. Hon. Sempe Gabasheane Masupha | Principal Chief of Ha ’Mamathe, Thupa-Kubu, Teya-Teyaneng le Jordan |
| 4. Hon. ’Mamolapo M. Q Majara | Principal Chief of Ha Majara |
| 5. Hon. Tumane Matela | Principal Chief of Makhoakhoeng |
| 6. Hon. Moeketsi Moletsane II | Principal Chief of Taung |
| 7. Hon. Lerotholi Mathealira Seeiso | Principal Chief of Mokhotlong |
| 8. Hon. Lerotholi L. Seeiso | Principal Chief of Likhoele |
| 9. Hon. Theko D. Bereng | Principal Chief of Phamong |
| 10.Hon. Mojela T. Makhaola | Principal Chief of Qacha’s Nek |
| 11. Hon. Seeiso S. H. Nkuebe | Principal Chief of Quthing |
| 12. Hon. Nthupi A. Bereng | Principal Chief of Rothe, Masite, Serooeng, Letšeng, Kolo Ha Mohlalefi le Thaba-Tseka Ha Ntaote |
| 13.Hon. K.L.K Khoabane Theko | Principal Chief of Thaba-Bosiu |
| 14. Hon. Mitchel S. Maama | Principal Chief of Ha Maama |
| 15. Hon Moholobela M. Moholobela | Principal Chief of Matelile |
| 16. Hon. Bereng G. Seeiso Api | Principal Chief of Ha Ramabanta le Kubake |
| 17. Peete Lesaoana Peete | Principal Chief of Koeneng le Mapoteng |
| 18. Hon. ’Mako T.Mohale | Principal Chief of Tajane, Ha Ramoetsana le Ha Mohale |
| 19. Hon. Khoabane T. Mojela | Principal Chief of Tebang, Tšakholo le Ha Seleso |
| 20. Hon. Retšelisitsoe Mopeli | Principal Chief of Botha-Bothe |
| 21. Hon. Pontšo S. Mathealira | Principal Chief of Tsikoane, Peka le Kolbere |
| 22. Hon. Qeto Sekonyela | Principal Chief of Malingoaneng |
| 23. Hon. ’Mawinnie Kanetsi | Senator |
| 24. Hon. Lebona Khoaele | Senator |
| 25. Hon. Thabiso Lebese | Senator |
| 26. Hon. ’Maphakiso Lebona | Senator |
| 27. Hon. ’Mabataung Patricia Mokhathali | Senator |
| 28. Hon. Sehloho Henry Monatsi | Senator |
| 29. Hon. ’Makholu Moshoeshoe | Senator |
| 30. Hon. Neo Matjato Moteane | Senator |
| 31. Hon. Seabata Motsamai | Senator |
| 32. Hon. Richard Ramoeletsi | Senator |
| 33. Hon. Limpho Tau | Senator |
PARLIAMENT OF THE KINGDOM OF LESOTHO
SENATE CHAMBER
TUESDAY 2nd JUNE 2026
The House assembled at 10:30 a.m.
(MR. VICE-PRESIDENT in the Chair)
PRAYER
The Chaplain led the House in Prayer
COMMUNICATION FROM THE HOUSE
MR. VICE-PRESIDENT: Kea le lumelisa, Litho tse Khabane, le ho le amohela Tulong ea Letsatsi lena, ke na le Litsebiso tse seng ngata haholo.
- Ea Pele, Litho tse Khabane ke hore ha le sheba Order Paper eno le tla bona hore re ntse re na le Setšoantšo sane sa Molao, se ntseng se hlaha mona sa Children’s Protection and Welfare Bill 2023, se lokelang ho tla tataisoa ke Mohlomphehi Letona le Khabane la Social Development. Taba ena e tla lula e hlaha ho Order Paper ho fihela Mohlomphehi Letona le Khabane a fetisitse Litaba tseno. Tlhophiso ke hore o tla tla a etsa Mosebetsi ono hosane, re be re o phethele.
- Ntle le mono, re ne re loketse hore e be kajeno re tl’o ba le Motion oa Morena Joel empa re ile ra etsa tlhophiso le eena hore re lumellane hore re fetise Business ena ea ‘Muso. Ho na le Litšoantšo tsa Molao tse ‘maloanyana, tseo re ratang hore Komiti ea Ketsa-Molao e tle e fuoe nako letsatsing lena, e li sebetse e li qete e le hore le tsona hosane ha maemo a re lumella, re tle re tsebe hore re li fetise le tsona. Re lakatsa hore ha re phomotsa Ntlo, re phomola re sa bolele nako ea ho bula, re phomole joalo re li fetisitse and we think it is possible hore re etse joalo within a very short space of time hobane tse ling tsa Litšoantšo tsena, ruri li khutšoanyane haholo.
Tse ling I have been told hore ke leqephe feela ho isa ho a mabeli. So, e leng ho re ke litaba tse tla tseba hore li etsahale hosane. Ke ka hona re rerileng hore re tle re fe Komiti ea rona ea Ketsa-Molao hore kajeno e tl’o shebana le Litaba tseno e le hore e tle e etse Litlaleho hosane joale re tle re tsebe hore re fetele litabeng tseno.
- Tsebiso e ‘ngoe, Litho tse Khabane, ke ho re re amohetse Setšoantšo sa Molao sa National Assembly Electoral Amendment Bill 2026, ‘Me ke kopa Litho tse Khabane li fuoe likopi, Setšoantšo seno se fetele Komiting ea rona ea Ketsa-Molao. Taba ena ea Children’s Protection and Welfare Bill 2023 ke se ke buile ka eona Litho tse Khabane.
- Tsebiso e hlahlamang kea hore hang ha Ntlo e phomola kajeno, Komiti ea Ketsa-Molao e tla kopana hona ka mona ka Chamber le Lekala la Thuto le Koetliso ‘moho le bohle ba chang ba tšola litabeng tsa Setšoantšo sa Molao sa Assessment Council of Lesotho sa 2026.
- Ntle le mono Komiti ea Ketsa-Molao e tla boela e kopana le Lekala la tsa Lehae le Sepolesa holim’a Setšoantšo sa Molao sa Public Holidays 2025.
- Ebe hape Komiti ea Ketsa-Molao hona kajeno, e tl’o boetse e kopana le Komisi e Ikemetseng ea Likhetho ho tla tšohla Setšoantšo sa Molao sa National Electoral Amendment Bill 2026.
- Tsebiso e latelang Litho tse Khabane, kea hore ke ka masoabi a maholo re le tsebisang ka Lefu la eo e kileng eaba Setho sa Ntlo ea Paramente ea Bosupa ka mona ka Ntlong ea Senate e leng Mohlomphehi Tšeliso Khomari.
Lefu le mo khaolelitse ka Laboraro la la 27 Motšeanong 2026, ‘me joaloka kamehla. re lokela ho ema Litho tse Khabane, re khutse motsotsoana feela e le ho isa tlhompho ho eo a seng a re sihile.
A Moment of silence, was Observed.
Rea leboha Litho tse Khabane, Moea oa hae le oa Balumeli bohle o phomole ka khotso Mohaung oa Molimo, rea leboha.
Ha ke tsoela-pele litabeng tsona tsena tsa Mohlomphehi Tšeliso Frisco Khomari, re hlaloselitsoe koano hore Litšebeletso tsa Sehopotso sa hae, e leng Memorial Service, li tla tšoareloa ‘Manthabiseng Convention Centre ka Laboraro la la 03 June, ke bona eka ke hosane, ka 14:30 hours. ‘Me Litšebelletso tsa Lepato la hae tsona li tla ba ka Moqebelo oa la 06 Phuptjoane mane Bambatha Tšita ho tloha ka 08:00 a.m.
Litho tse Khabane, kaha ha re na nako e ngata joalokaha ke hlalositse qalong, empa ke re kaha ha re sa hlotse re ba le nako e ‘ngoe haufinyane, re ke re fe Litho tse peli kapa tse tharo li ts’elise Lelapa la ha Khomari ka tahlehelo eo, re fe ba bararo monyetla oa hore ba tšelise, Morena Mohale.
HON. SENATOR T. M. MOHALE: Kea leboha hle, Ntate Motlatsi oa President le Litho tse Khabane, ha e le mona u re fa monyetla oa hore re ke re hopole bophelo ba Ntate Khomari.
Joalokaha u hlalositse Ntate Vice-President, u bua ka Ntate Khomari eo bileng Setho sa Ntlo ena e Khabane ea Mahosana Paramenteng ea Bosupa. ‘Me ha u bua ka taba ea Ntate Khomari Paramenteng ea Bosupa, nakong eno o entse lintho tse kholo. O ile a thusa Ntlo ena e kholo litabeng tsa naha. Ke moo re tla hopola hore Komiting ea Litho tse Khabane ha ho ne ho u-oe Botswana ka ho leka ho ntlafatsa Paramente le Basotho, Ntate Khomari e ne e le ea neng a tsoka sephali.
Ke tokelo ea rona ea ho mo hoopla, le ho mo leboha ka makhabane ao a etselitseng naha ka Ntlo ena e Khabane. ‘Me ho tloha mono, re tla hopola hore Ntate Khomari e ile ea eba Mongoli e moholo Lekaleng la Likhokahanyo. Le teng maputulo a Ntate Khomari re ntse rea tseba le hore na boikitlaetso ba hae bo bile bokae litabeng tsa Puso le ho bona hore Puso ea ntlafala.
Ha re bua ka Ntate Khomari litabeng tsa lipolotiki, Ntate Vice-President, re tla hopola hore Likhethong tsa ho etella pele Paramente eno ea Bosupa, e ile ea ba e mong oa baikiti a le mong. Ke hore taba ea ho iketela likhetho o sena party eo u e salang morao, Ntate Khomari ebile mohlala o joalo Ntate. ‘Me Litaba tseno, li bontša boikitlaetso ba hae le hore ntho ha a ne a batla ho e etsa, o ne a fela a e etsa.
Ha re bua ka Ntate Khomari ka ntle ho litaba tsa Paramente le litaba tse ling ka thoko, bohle ka hara naha re mo tseba ka lebitso la Frisco. ‘Me Ntate Khomari ka lebitso la Frisco. Ebile mohale ea tšabehang litabeng tsa lipapali, litabeng tsa lipapali tsa bolo le litabeng tsa papali ea tennis, re kenyelletsa le mabelo. ‘Me ha u sheba hore na boiphihlelo le tjantjello ea Ntate Khomari lipapaling na e bile hakae, ke mona moo re tla lla, re re hoja Frisco o phetse linakong tseo bolo e leng mosebetsi, eseng nako eo bolo e neng e le papali ea ho thabisa matšoele.
Frisco o ne a ikitlaelitse hoo a bapalletseng lithimi tse ngata ka hara naha ho kenyelletsa Bantu, Ambassadors, School Boys eo a tsebiloeng ka eona, esitana le Rovers. ‘Me, o ne a bapalla lithimi tsa South Africa, re tla mo hopola ka boikhantšo boo re neng re itlotla ka bona ka Frisco Khomari, ha a ne a bapalla Bloemfontein Celtics.
Litaba tsa Frisco litabeng tsa papali, Ntate Vice-President, hase litho tseo u ka li qetang hobane le ha a hlokahala tjena, o hlokahala a ntse a sebelletsa hore taba ea bolo Lesotho mona, ea ho tlotla lipapali, ebe ntho e etsahalang ho latela takatso ea Frisco Khomari. Re ne re tlameha hore mokete ona oa Moshoesoe ebe re o keteka e le mokete oa bosechaba moo lipapali li nkuoang li bile le kabelo sechabeng sa Basotho ’me ha ke se ke chulo joalo Ntate Motlatsi oa President litaba tsa Ntate Frisco ha re na ho li qeta, litabeng tsa papali le mesebetsi ea hae.
‘Me hoa rona ke ho ts’elisa lelapa la Khomari ka hore lelapa la Khomari le lahlehetsoe ke mohale, ‘mopo oo le o tsoetseng ke ‘mopo oo re le naha re tlamehang ho mo hopola ka lintho tsohle tseo a li etselitseng naha ea Lesotho e le motho ‘me e se eka le linthong tsohle tseo mefokolo ea botho eo re bopelletsoeng le eona Morena Molimo a ka mo ts’oarela ‘me ka mantsoe ana Ntate Vice-President ke se ke mpa ke kopela moea oa Ntate Khomari phomolo e sa feleng, Morena Molimo a mo ahlole ka mohau ‘me moea oa hae o phomole ka khotso mohaung oa Molimo Kea leboha Ntate.
HON. SENATOR S. MOTSAMAI: Ntate Vice-President, Honourable Minister, Tafole, Litho tse Khabane, che kea bona le baeti ba rona moo ho gallery. Ke ne ke mpa ke re ke akhele a mabeli mantsoe ka Ntate Khomari. Ntate Khomari o phetse bophelo ka lits’obotsi tse fapakaneng tsa bophelo, multi-identities.
O tsebiloe e le monna oa senatla oa lipapali, a tsejoa e le mosebeletsi, administrator, a tsejoa e le ralipolotiki, a tsejoa e le monna oa lelapa. Litaba tsena kaofela tsa re etsetsa a Man of a Character eo ka ‘nete re lla hobane lefu e le ntho e sa tloaheleheng feela joale ka bomali-mabe e le eona feela tsela ea ho kopana le Molimo oa hau le balimo ba hau hobane ho latela mesebetsi ea hae, ho latela ka mokhoa oo re mo tsebang hore moo a neng a ts’oere hangata o ne a ikitlaetsa ho le hokae, litaba tseno kaofela re ne re tla re o mathile lebelo la hae o qetile. He has run the race.
Ke tena ke cho joalo hobane ke re lilemo tsa hae li ne se li fihlile moo re ka ‘nang ra re rea ‘mona, empa ka hobane rona ba lefats’eng tumelo ea rona e fokolang e hana ho lumela hore o sebelitse moo a sebelitseng hona teng. ‘Na ke mpa ke re ke motho e moholo haholo ho ‘na feela ke ‘mone, ke ile ka ba pela hae ka tse ling ke bone ke motho ea neng a le mafolo-folo joang linthong tseo a neng a sebetsana le tsona.
E le hore ka tsela eno Ntate Vice, ‘na ke ne ke tla re ha ho na ntho eo re ka e buang e ngata ha e se hore o entse oa hae mosebetsi ‘me ka hona ‘na ke re re nkeng mantsoe ane a rona a Sesotho ha a bua ka eena re re re bile le mohale ’me ka hona kaha re bile le mohale ha re mo lumelleng, re sebelise mantsoe ane a hore moea-hahabo ha a thijoe, ho thijoa moea-ntoeng, mo tloheleng a il’o kopana le Molimo le balimo ba hae.
Ha re nkeng legacy eo a re sietseng eona lona ba lipapali le tsebe ho bona na batho ha ba ithukhubetsa ba na le lerato la lipapali na ho etsahala joang. Ntate Khomari e bile karolo ea tsamaiso ea LeFA, e le hore e ne e le administrator. Re ne re ‘mona hore na boeta-peleng ba hae le thaka-‘moho tsa hae bo-Ntate Makakole ha ba ne ba tsamaisa lipapali ba ne ba litsamisa joang.
O ne a tsamaisa le tsona lipapali joalokaha Ntate Mohale a se a buile. Ke motho eo ha a ne a ntse a tsamaisa papali – team eno eo ho thoeng ke School Boys, ‘na ke se ke le moholo ba bang kea tseba ka mona ha ho na ntho eo ba ka ba ba e tseba, ba ts’oanang le Morena oa Leribe hore Pitso Ground mane ho ne ho e na le banna ba lulang moo, ho thoe ba lula ts’inabelong, ho ne ho buuoa ka ‘na hee Morena oa ka, Morena oa Leribe.
Ha u ne u mametse seea-le-moea, ha ho ne ho thoe banna ba ts’inabelong ho ne ho buuoa ka ‘na, hobane uena o ne u sa le monyane. U ne u ke ke oa fihla lebaleng. Ke ne ke re team ena ea hae ho na le nako eo e neng e ts’oanela ho ea li-relegation joale ra be re tlameha hore joale re mo kenyetse li-reserve ka nkane, re le banna ba ts’inabelong ‘me lea tseba na discipline tsa batho ba li-coach na ke ntho e joang. Ha se batho ba ratang ho susumetsoa ke lintho tse sa tsamaeeng ka plan ea bona.
Empa o ne a tseba hore a etse adjust ka nako e ‘ngoe ha a re re Jack ha a kene, ‘nyeo ha a kene ebe ha a qeta ba mo fumanela tlholo. Ke leka hore ke re o ne a tseba ho amohela.
Ha re se re ka hlalosa ka mantsoe a morao-rao tjena hore ho ne ho e na le li-stake-holders papaling ea bolo tse sieo ka lebaleng, taba eo ‘na ke ne ke e nka e le taba ea bohlokoa hore ho na le motsotso oo, ’me e ne e phonyohe team eno ea hae.
O ne a etsetsoa li-substitute ke banna bano ba ts’inabelong.
Ke ne ke mpa ke re ka mantsoe ana a mabeli ka ‘nete ha re mo lumelleng a tsamaee hoba o khathile tema ea hae, o phethile seo a neng a se bitselitsoe lefats’eng, kea leboha.
HON. J. A. MOTS’OENE: Kea leboha Mohlomphehi Motlatsi oa President. Ke hlomphe Tafole ea hau, ke hlomphe Litho tse Khabane. Mohlomphehi Ntate Frisco ka tsela eo a neng a tloaelehile ka teng, re bile le eena kahare ho Ntlo ena Paramenteng ea Bosupa. Litho tse Khabane li se li buile litaba tse ling ka eena empa kea kholoa motho u tla mo hopola haholo-holo papaling ea bolo joalokaha Setho se Khabane se qetang ho bua se ile sa pakahatsa litaba tseo, tsa ts’inabelo le hore re ne re sa le banyane haholo.
Kea kholoa motho o ile oa ba lehlohonolo la hore nakong tsona tseo re ne re e na le ho ea lipapaling hobane bolo e ne sa le papali e nketsoeng holimo haholo ‘me litabeng tse ling tsa bolo, motho u ka hopola bo-top 4, bo-top Mount, ‘me Ntate Khomari o ile a nka karolo tabeng tseo tsa bo-School Boys, re ba shebella ebile re ba mamela le liea-le-moeeng mona Setho se Khabane Honourable Senator Motsamai ha a bolela bonyenyane, e ne ntse e le baholoane ba rona ba sa re siheng hakaalo-kaalo. Re ne ntse re na le hore re ba fete ts’inabelong mono, o mpa a lebala mantsoe ao ba neng ba a sebelisa feela, che re kahar’a Ntlo ena e Khabane, motho u ke ke oa bua ka mantsoe ao ba neng ba a sebelisa.
Ha ba ne ba batla hore ho kenyoe bona batho bano ba reng ba ne ba ba etsesa set scheme ‘me Mohlomphehi litaba tsena motho u ka li hopola hobane ho ne ho e na le batho Leribe koana ba neng ba bitsoa Fighting-Boys ’me re ne re tseba hore ha ba ne ba kopane le batho ba Matlama Sea-Point mane e ne e ba litaba tsa mofuta ofeng.
Empa sebopeho sa Ntate Khomari e ne e se le motho ea buang haholo feela litaba tsa hae ha a ne a bua o ne a leka hore a u etse convince hore taba ena eo a e buang ehlile ke taba e molemo haholo. Mohlomphehi ke bua tjena hobane kahar’a Ntlo ena e Khabane ho na le litaba tse ngata tse ileng tsa etsahala Paramenteng eno ea Bosupa, ‘me joalokaha re ne re le Ntlong eane e tlase, ea khale o ne a sa lule hole haholo le moo re neng re lula teng.
E ne e ee re hangata ha re sa bua ebe oa re hoelehetsa o re ‘ae bua monna, o buelelle haeno Leribe koana kapa a bue le Setho se seng seo le sona se seng se ithoballetse Morena oa Likueneng. Hang-hang ka mokhoa oo re neng re mo tloahetse ka teng. Le eena moea oa hae o phomole ka khotso, o ne a re lona banna le banyane haholo feela joale ke bona le sa bue ka mona.
Mohlomphehi ke bonts’e feela hore Ntate Khomari leha e ne e se motho ea buang haholo, feela bophelo boo a bo phetseng haholo kahar’a sethala sa lipapali, kahar’a ts’ebetso ea Paramente eo ea Bosupa, e ne e le takatso ea hae ho bona Ntlo ena e ne e ka matlafala, a lula a matlafatsa lipapaling haholo ha a ne a sekametse lintlheng tseno. E ile ‘ne ea ba e mong oa Balula-Setulo kahar’a Paramente ka mona, ‘me ka ‘nete ts’ehetso ea hae litabeng tseno tsa tsamaiso eo a neng a e ts’epetsoe o ne a e phetha ka makhethe.
Leha a se ntse a se kahar’a ts’ebetso, e ne e le motho ea neng a ka soasoa, a ntse a its’ehela ka leboso leno la hae. Re ee re hopole mesebetsing e meholo ha re ne re kopana le eena ha re ne re potela o ne o tla utloa re re Bra-Frisco joaloka Setho se Khabane the American Spoon, Morena oa ka Morena oa Tajane, ‘me litaba tsena hle Mohlomphehi ruri ke tahlehelo haholo sethaleng sa lipapali hobane le malebela ba bang ba ne ntse ba a nka ho eena. Ka mantsoe ana hle re re moea oa hae le meea ea balumeli bohle ba falletseng lefats’eng e phomole ka khotso mohaung oa Molimo. Kea Leboha.
MR. VICE-PRESIDENT: Re lebohile haholo Litho tse Khabane ka mats’eliso ao a lona, ‘me le rona re se ntse re re Morena Molimo a tle a mo amohele joalokaha Morena Mohale a hlalositse, a tle a moahlole ka mohau e seng ka toka.
O buile ka nepo hore moea-hahabo ha a thijoe ‘me hle re re mantsoe ana a behiloeng ke Litho tse Khabane e se e ka a ka tlamella maqeba ano a lipelong tsa bona ka lebaka la tahlehelo ena, ekare a ka tiisa mangole a Basotho ka kakaretso le ho ts’elisa Motlotlehi hobane re lahlehetsoe haholo. Mofu ke motho oa bohlokoa ruri ‘me re ts’elisa bohle, re ts’elisa Basotho, re ts’elisa lelapa, re ts’elisa le ba lipapali bohle-bohle kaofela.
Ke ne ke re hle Litho tse Khabane ke hlokomelisoa ke Tafole mona taba ea bohlokoa haholo eo ke reng ka ‘nete e ka ba phoso e kholo ha nke keng ka le tsibisa ka koano. ‘Me ke utloa eka e kare ha kea ts’oanela ho le tsebisa feela; ho ka ba bohlokoa hape hore nke ke fe ba babeli hore letho ka eona.
Ke hlokomelisoa mona ke Tafole ea haeso hore kajeno ke letsatsi le leholo, ke letsatsi la tsoalo la ‘Marona ‘Mabasotho Motlotlehi Mofumahali ‘Masenate Mohato Seeiso ‘me ka ‘nete ke letsatsi le leholo haholo lena, leo ka ‘nete re ts’oanelang hore re le tsebise Litho tse Khabane ka letsatsi lena la bohlokoa.
Ka’ nete ke re lebitsong la Ntlo ena e Khabane ea Senate ke nke monyetla ona ho mo lakaletsa bophelo bo botle, bophelo bo botelele, bo se nang mats’oenyeho a letho. Re mo kopele matla le bohlale ho Morena Molimo hore a tsebe ho pepa le ho tataisa Sechaba sena sa hae sa Basotho joaloka Masechaba, joaloka ‘Marona, ‘Mabasotho hobane ruri ke motho e moholo haholo, ke lets’oao la kopano ea rona, ke lets’oao la bonngoe ba rona ‘me ha ho na le likarohano le liphephetso re sheba lelapeng leo ebe joaloka ‘Marona ha re tseba hore bo-‘M’e oa rona ke batho ba baholo, haholo ruri eba tsohle li tla khutlela taolong ha re ile ra fumana tataiso ho tsoa mono kapa ra mamela litaba tsa bohlokoa ho tsoa moo. Kannete lebitsong la Ntlo ena e Khabane ke re ke nke monyetla ona ho mo lakaletsa khaphu-khaphu ea mahlohonolo a letsatsi lena le leholo la hae la tsoalo, le bohlokoa haholo ho rona re le Basotho kahare le kantle ho naha.
Ke ne ke shebile hore ka 11:00am re tle re phomotse Ntlo empa hee ke ne ke re hle ke fe a le mong feela beng ba ka a mpe a re letho hle ka ’M’e Motlotlehi a mo lakaletse mahlohonolo.
HON. SENATOR N. A. BERENG: Kea leboha Ntate Vice, ke hlomphe le Tafole ea hau, ke hlomphe le Bahlomphehi. ‘Me ‘Masenate rea mo lebohela, re re a hole, a holele Basotho.
Rea leboha.
MR. VICE-PRESIDENT: Ke ne ke file a le mong Morena oa ka hobane re ne re se re ntse re itse rea koala, empa a k’u re ke mpe ke u fe u ke u re letho re tsebe ho phomola.
HON. SENATOR R.P.L. PEETE: Kea leboha Ntate Vice-President, kea u hlompha Ntate, ke hlompha Ntate Minister le Tafole ea hau le Litho tse Khabane tsa Ntlo ea Mahosana. Ke thoholetsa taba ena Ntate, ke ne ke rata hore ke tle ke se ke ka tsoa lekoteng… Ke ne ke re Ntate ke thoholetsa maikutlo ana a hau a hore re ke re re letho ka letsatsi la tsoalo la ‘Marona.
Ntate ke ntho e kholo haholo, e tla ba history naheng ena ea Lesotho hore ka letsatsi lena Ntlo ena ea Senate e ile ea etsa mantsoe a mabeli kapa a mararo a teboho. Re leboha Morena Molimo ka hore ebe o re file ‘M’e Motlotlehi Mofumahali e le motho oa libopeho tsena tsa hae.
‘M’e Motlotlehi ke motho oa libopeho tsa hae Ntate ea nang le lerato le khaphatsehang sechabeng sa hae. Re bona ntho eno ka letlole lane leo a le entseng la likhutsana le bana ba se nang moo ba nkang teng, moo a reng Mafumahali a Marena a Sehlooho le Mafumahali ‘ohle mona Lesotho ba ne ba be le nako ea ho ikopanya ba ke ba qoqe le ho shebisana hore bana ba Basotho bao ho se nang moo ba nkang teng bao ka nako e ‘ngoe ba se nang le batsoali na eena Motlotlehi bana bano na o ba etsa joang le hore na o laela Marena ana le sechaba sa boithatelo bo botle ho re na se etsa joang ka bana bano ba Motlotlehi ‘M’e Mofumahali Khosi.
Joale ke ne ke re Ntate ke taba e ntle haholo haeba Ntlo ena ea hau e ka ba le boinahano ba hore e re ha e le letsatsi la motho e moholo hakaalo re ke re re re ile ra ka ra fa ‘M’e Nthupi sebaka sa hore a re lebohele ho Morena Molimo hore ebe re na le motsoali oa mofuta o joalo eo e bileng a ntseng a phela bophelo bo ntseng bo le botle. Ea ntseng a phela hantle ‘meleng, ea ntseng a phela kelellong le moeeng. Ke taba e lokelang hore re e lebohe eno Ntate ‘me re lebohisa Basotho ke hona.
Kea leboha.
MR. VICE-PRESIDENT: Re lebohile haholo Morena oa ka, ka ‘nete u behile ka makhethe hobane joale ha u ka ba oa mamela ba fats’e, hoja u ile oa mamela ba fats’e ehlile u ka be u ile oa tlaila. Ka ‘nete u behile litaba tsena ka makhethe a maholo ‘me rea leboha joalo ka ha re chulo re lakaletsa ‘Marona ‘Mabasotho mahlohonolo a mangata-ngata le bophelo bo botle le matla le bohlale le tsohle hore a re tataise, a re fe lerato re tsebe hore re le fetisetse ho bohle kaofela.
Litho tse Khabane re hlalositse hore hang ha Ntlo e phomola Komiti ea Ketsa-Molao e batla e na le mosebetsi o mongata haholo ka koano o lokisetsang hore ho tlo tla ho kena li-Bill ka mona hosane, ‘me re kopa hore re phomotse Ntlo ho fa Komiti eo monyetla oa hore e tlo tla e etsa mosebetsi ono o mongata oo e tlo tla e o etsa kajeno.
ADJOURNMENT
There being no further Business on the Order Paper, Mr. Vice-President adjourned the House without Question put, pursuant to the Standing Order No. 16 (3).
The House was adjourned at 11:08 a.m.